ប្រវត្តិចលនាកាកបាទក្រហម​

ប្រវត្តិចលនាកាកបាទក្រហម អឌ្ឍចន្ទក្រហមអន្តរជាតិ

នៅថ្ងៃទី ២៤ ខែ មិថុនា ឆ្នាំ ១៨៥៩ លើសមរភូមិសុលហ្វេរីណូ (ភាគខាងជើងអ៊ីតាលី) កងទ័ពបារាំង និង អ៊ីតាលី រួមគ្នាវាយប្រយុទ្ធនឹងកងទ័ពអូទ្រីសក្នុងរយៈពេល ១៦ ម៉ោង បានបណ្តាលអោយស្លាប់និងរបួស ជាង ៤ ម៉ឺននាក់។ 

លោក ហង់រី ឌុយណង់ ពាណិជ្ជករជនជាតិស្វីស បានផ្តើមគំនិត ប្រមូលអ្នកស្ម័គ្រចិត្តជួយសង្គ្រោះអ្នករបួសទាំងនោះ ដោយពុំមានគិតខាងណាជាមិត្ត ខាងណាជាសត្រូវឡើង។ បន្ទាប់ពីព្រឹត្តិការណ៏នោះ លោក ហង់រី ឌុយណង់ បានសសេរសៀវភៅមួយ កត់ត្រាពីអ្វីៗដែលកើតមាននៅ សុលហ្វេរីណូ។ 

នៅឆ្នាំ​១៨៦២ លោក ហង់រី ឌុយណង់ បានផ្សព្វផ្សាយសៀវភៅរបស់លោក មានចំណងជើងថា «អនុស្សាវរីយ៍នៅសុលហ្វេរីណូ» ដែលក្នុងនោះ លោកបានផ្តល់នូវគោលគំនិតសំខាន់ ២ គឺ ៖

១-បង្កើតសមាគមជួយសង្គ្រោះនៅប្រទេសស្វីស ហើយនៅតាមប្រទេសនីយមួយៗ ក៏ត្រូវបង្កើតឲ្យមាន សមាគមជាតិដែលជួយសង្រ្គោះតាមប្រទេសរៀងៗខ្លួន។ 

២-បង្កើតឲ្យមានច្បាប់សម្រាប់គោរពការជួយសង្រ្គោះ។

នៅប្រទេសស្វីស ឥស្សរជន ៥ រូប​ គឺលោក ហង់រី ឌុយណង់ ឧត្តមសេនីយ ហង់រី ឌុយហ្វូរ ឧត្តមសេនីយ ម៉យនៀ វេជ្ជបណ្ឌិត ល្វីស អាភា និង វេជ្ជបណ្ឌិត ធីម៉ូណ័រ បាននាំគ្នាបង្កើតឲ្យមាន «សមាគមអន្តរជាតិសង្រ្គោះអ្នករបួស» នៅថ្ងៃទី ១៧ ខែកុម្ភៈ ឆ្នាំ ១៨៦៣។ នៅឆ្នាំ ១៨៦៧ សមាគមនោះក៏ត្រូវបានប្រែឈ្មោះមកជា «គណៈកម្មាធិការអន្តរជាតិកាកបាទក្រហម» ។ 

នៅឆ្នាំ ១៨៦៣ នោះ ជាមួយនឹងការបង្កើតឲ្យមានសមាគមអន្តរជាតិសង្គ្រោះអ្នករបួស ក៏មានការកំណត់យក បដិរូបកាកបាទក្រហម ជាអត្តសញ្ញាណការពារ និង សម្គាល់ សេវាកម្មសង្គ្រោះអ្នករបួស ហើយនៅតាម បណ្តាប្រទេសនានាក៏ចាប់ផ្តើម បង្កើតឲ្យមានសមាគមជាតិ ធ្វើសកម្មភាពផ្តល់ជំនួយមនុស្សធម៌ជួយអ្នករបួស។ 

ប្រវត្តិកាកបាទក្រហមកម្ពុជា

កាកបាទក្រហមកម្ពុជា ជាអង្គការមនុស្សធម៌ធំជាងគេក្នុងប្រទេស។ កាកបាទក្រហមកម្ពុជាបច្ចុប្បន្នត្រូវបានទទួលស្គាល់ដោយ ព្រះរាជក្រឹត្យលេខ នស/រកត/ ០៥០២/១១៣ ចុះថ្ងៃទី ៦ ខែ ឧសភា ឆ្នាំ ២០០២ ថាជាអ្នកបន្តវេន សមាគមជាតិកាកបាទក្រហមខ្មែរ ដែលត្រូវបានបង្កើតឡើងដោយមហាសន្និបាតនៅថ្ងៃទី ១៨ កុម្ភៈ ឆ្នាំ ១៩៥៥ ហើយដែលក្នុងដំណាក់កាលនោះ ត្រូវបានទទួលស្គាល់ដោយព្រះរាជក្រឹត្យលេខ ៣៧៨/នស ចុះថ្ងៃទី ១៦ ខែមិថុនា ឆ្នាំ ១៩៥៨។ 

កាកបាទក្រហមកម្ពជាត្រូវបានបង្កើតឡើងក្នុងគោលបំណងផ្តល់ជំនួយសង្គ្រោះ និង ធ្វើជាជំនួយការឲ្យអាជ្ញាធរសាធារណៈ ក្នុងវិស័យមនុស្សធម៌។ 

កាកបាទក្រហមកម្ពុជា ត្រូវបានទទួលស្គាល់ដោយ គណៈកម្មាធិការអន្តរជាតិ កាកបាទក្រហម នៅថ្ងៃទី ៦ ខែ តុលា ឆ្នាំ ១៩៦០ និង ត្រូវបានបញ្ចូលជាសមាជិកទី ៨៥ របស់សហព័ន្ធអន្តរជាតិនៃសមាគមកាកបាទក្រហម អឌ្ឍចន្ទក្រហម នៅថ្ងៃទី ៧ ខែតុលា ឆ្នាំ ១៩៦០។ 

   

                       

ប្រភព៖ ទស្សនាវត្តីកាកបាទក្រហមកម្ពុជា លេខពិសេស​

ចេញផ្សាយដោយ អនុគណៈកម្មការខ្លឹមសារព័ត៌មាន ផ្សព្វផ្សាយ និង​ពិព័រណ៏ នៃគណៈកម្មធិការរៀបចំ ទិវាពិភពលោក កាកបាទក្រហម អឌ្ឍចន្ទក្រហម